MÜNCHEN (Aftenbladet): Sola skin i München, det eit lite drag i lufta og nesten tretti grader. I bakgården til utøvarhotellet kjem Mathias Hove Johansen gåande med eit videokamera i handa.

Kameraet er stort sett alltid med sprintaren, og har gjort han kjent langt utanfor Norges grenser.

EM-debutanten frå Stavanger har kvar veke tusenvis av sjåarar på YouTube-kanalen sin. Nesten 40.000 abonnerer på kanalen og den mest populære videoen er sett nesten ein halv million gongar.

– Eg har masse internasjonale sjåarar og mykje sprintarar. Eg veit ikkje kor mange sprintarar det er i verda, men det begynner å bli ein god andel som veit kven eg er. Det er kjekt, seier 23-åringen til Aftenbladet.

Amerikanarane står for den største delen av følgarskaren, med India hakk i hel. Faktisk er det berre 1–2 prosent av sjåarane som kjem frå Norge.

Deltidsjobb

Sidan 2017 har Skjalg-sprintaren delt treningsvideoar flittig med følgarane sine. Han deler mykje, og er opptatt av å vise heilskapen. Der andre sprintarar deler ei økt i ny og ne, får Hove Johansen sine følgjarar sjå nesten alt han gjer på vegen mot sprinttoppen.

– Eg syns det er kjekt å dele og får litt ekstra av det. Eg hjelp litt andre som ikkje har så mykje struktur rundt trening, og likar å dele korleis eg blir betre. Det går med ein del tid til det, nokre timar om dagen. Eg prøvar å behandle det som ein deltidsjobb, seier han.

Førebels tener han ikkje så mykje på deltidsjobben, men det blir nokre tusenlappar i månaden.

Kameraet er stort sett alltid med Mathias Hove Johansen. Han doumenterer det aller meste av trening og førebuingar til konkurransar. Foto: Mari Sollid Eide / Stavanger Aftenblad

Får støtte frå tribuna

Hove Johansen merkar godt at YouTube-kanalen har blitt lagt merke til langt utanfor heimlandet.

– Uansett kvar eg reiser for å springe, er det nokon som har sett videoane. Det er veldig kjekt. Sjølv om det ikkje er nordmenn til stades, er det støtte frå tribunen, fortel 23-åringen.

Dei fleste som ser på er sprintarar sjølv, og Stavanger-karen deler gjerne tips med følgjarane. Han får mange meldingar frå folk som følgjer med. Til og med frå konkurrentar.

Hove Johansen hadde lenge ein personleg rekord på 21,00 på 200 meter og hadde ein serie på YouTube som heitte «Road to 20».

Under eit stemne i Romania i fjor inntok han bana for å springe stafett og såg ein kar med eit skilt på tribuna der det stod «Road to 20».

– Då eg gjorde meg klar stod eg i bana ved siden av Romania sitt lag. Då seier han eg skal springe mot at han har sett videoane mine. Det var kult, smiler han.

Håpar på semifinale

Også under EM blir videokameraet flittig brukt. Han filmar førebuingane inn mot løpet. Torsdag skal Hove Johansen i aksjon under forsøksheatet på 200 meter.

Då er målet å ta seg til semifinalen og nærme seg persen på 20,68.

– Viss eg får til eit superløp, håpar eg å springe rundt 20,5. Vi får sjå, seier han.

12.30 torsdag inntar Hove Johansen mektige Olympiastadion i München. Tar han seg til semifinale går den 20.13 samme dag. Løpa blir vist på NRK.