Eg har ei lita likning å fortelja i stil med bibelforteljingane: Ein bonde går forbi huset mitt, og eg ber som å få kjøpa ein kålrabi av han. «Ja», seier han, «send femti kroner med hjelparen min når ho kjem forbi, så får du kålrabien av meg i morgon».
Som sagt så gjort; eg gir hjelparen hans pengane, men neste dag har bonden ikkje kålrabi med. «Eg har ikkje fått pengane», seier han, «du må snakka med hjelparen min om det, det vedkjem ikkje meg kva de avtalar».
Eg syns at eg alt oftare kjem i situasjonar der ein seljar ikkje vil ta ansvaret når hjelparane ikkje gjer det seljaren har lova. Det gjeld særleg når det er digitale løysing inne i biletet.
Nå sist var seljaren AtB og hjelparen heitte Strex Payment AS. Eg brukte Atb-appen på telefonen min, kjøpte billett og gjekk på bussen. Så kom ikkje den vanlege kvitteringa med grøn stripe opp som vanleg, men eg fekk to sms-ar om at eg hadde kjøpt billett, ein av dei var frå Strex.
Det stod ei gruppe hyggelege kontrollørar frå AtB like ved der eg sat, så eg viste dei telefonen min og spurde kva som hadde skjedd. Dei sa at eg ikkje burde ha gått på bussen utan kvitteringa, men burde ha kjøpt ny billett. Så kunne eg søkja om refusjon om det vart dobbelt belastning.
Om kontrollørane ikkje hadde hatt pause nett då, ville eg fått bot. Når ikkje rette kvitteringa med grøn stripe kjem opp på telefonen til en passasjer, har dei instruks om å gi bot. Det at eg hadde to kvitteringar for at eg hadde betalt til hjelparen Strex var irrelevant, det beviste ikkje at AtB hadde fått pengane.
Slik gir AtB oss appar til å kjøpa billettar, men om dei ikkje fungerer, så er det kunden, og ikkje AtB sitt problem.
Dette er ein bagatell, men ansvarsfordelinga mellom seljarar, deira hjelparar og kunden er eit prinsipielt viktig spørsmål, og det ville vera interessant å høyra frå AtB kva som er det juridiske grunnlaget for denne rutinen.
Dessutan er det godt for AtB-kundar å vera klar over regelen som var ukjend for meg.
Eg veit at om ein billett-automat på ein stasjon ikkje fungerer så blir det godtatt som grunn til ikkje å ha gyldig billett. Korleis er dette ulikt frå at Strex eller AtB sine appar ikkje fungerer?
Hva mener du? Slik skriver du for Adresseavisen Midtnorsk debatt!